യേശുവില്‍ കേന്ദ്രീകൃതമാണ് തിരുക്കുടുംബം: ഫ്രാന്‍സിസ് പാപ്പാ
വത്തിക്കാന്‍: ബാലനായ യേശുവിനെ കാണാതായപ്പോള്‍ ആകുലത അനുഭവിച്ച ജോസഫിന്റെയും മറിയത്തിന്റെയും അവസ്ഥ യേശുവില്ലാത്ത കുടുംബങ്ങള്‍ അനുഭവിക്കുന്ന ദുരവസ്ഥയെയാണ് സൂചിപ്പിക്കുന്നതെന്ന് ഫ്രാന്‍സിസ് പാപ്പാ. തിരുക്കുടുംബം വിശുദ്ധ കുടുംബമായിരിക്കുന്നത് യേശുവിന്റെ സാന്നിധ്യമുള്ളതു കൊണ്ടാണ്, പാപ്പാ പറഞ്ഞു.
നമ്മള്‍ യേശുവിനെ മറക്കുമ്പോള്‍, പ്രാര്‍ത്ഥിക്കാതെ ദിവസങ്ങള്‍ തള്ളി നീക്കുമ്പോള്‍, നമുക്ക് യേശുവിനെ നഷ്ടപ്പെടുകയാണ്. അപ്പോള്‍ നമ്മളും മറിയത്തെയും ജോസഫിനെയും പോലെ വ്യാകുലത അനുഭവിക്കണം. അവിടുത്തെ അന്വേഷിക്കണം, പാപ്പാ വിശദമാക്കി.
ലോകത്തിലെമ്പാടുമുളള കുടുംബങ്ങള്‍ക്കായി പ്രാര്‍ത്ഥിക്കാന്‍ ഫ്രാന്‍സിസ് പാപ്പാ ആഹ്വാനം ചെയ്തു. പല കുടുംബങ്ങളിലും സമാധാനവും ഐക്യവുമില്ല. അത്തരം കുടുംബങ്ങളെ നമുക്ക് തിരുക്കുടുംബത്തിന്റെ സംരക്ഷണത്തില്‍ ഏല്‍പിക്കാം, മാര്‍പാപ്പാ പറഞ്ഞു.
