അമേരിക്കയെയും കാനഡയെയും പരിശുദ്ധ അമ്മയ്ക്ക് സമര്‍പ്പിക്കും
ലോസ് ആഞ്ചലോസ്: കോവിഡിന്റെ പശ്ചാത്തലത്തില്‍ അമേരിക്കയെ പരിശുദ്ധ കന്യമാതാവിന് സമര്‍പ്പിക്കുന്ന കര്‍മത്തില്‍ തന്നോടൊപ്പം പങ്കു ചേരാന്‍ യുഎസ് ബിഷപ്പുമാരോട് യുഎസ് ബിഷപ്പ്‌സ് കോണ്‍ഫറന്‍സ് പ്രസിഡന്റ് ആര്‍ച്ചുബിഷപ്പ് ജോസ് ഗോമസ് ക്ഷണിച്ചു. മെയ് 1 ാം തിയതിയാണ് സമര്‍പ്പണം. യുഎസ് മെത്രാന്മാരോട് ചേര്‍ന്ന് കാനഡയിലെ മെത്രാന്മാരും തങ്ങളുടെ രാഷ്ട്രത്തെ മാതാവിന് സമര്‍പ്പിക്കും.
തിരുസഭയുടെ മാതാവായ മറിയത്തിനാണ് അമേരിക്കയുടെ പുനര്‍സമര്‍പ്പണം നടത്തുകയെന്ന് ആര്‍ച്ചുബിഷപ്പ് ജോസ് ഗോമസ് അറിയിച്ചു. ഏപ്രില്‍ 22 ന് എല്ലാ അമേരിക്കന്‍ മെത്രാന്മാര്‍ക്കുമായി അയച്ച കത്തിലാണ് ആര്‍ച്ചുബിഷപ്പ് ജോസ് ഗോമസ് ഇക്കാര്യം അറിയിച്ചത്.
‘എല്ലാ വര്‍ഷവും മെയ് മാസത്തില്‍ പരിശുദ്ധ മാതാവിനോട് പ്രത്യേക മാധ്യസ്ഥം സഭ തേടാറുണ്ട്. ഈ വര്‍ഷം, കൊറോണ പകര്‍ച്ചവ്യാധിയുടെ പശ്ചാത്തലത്തില്‍ കൂടുതല്‍ തീക്ഷണതയോടെ നാം മാതാവിന്റെ മാധ്യസ്ഥം തേടുകയാണ്’ ആര്‍ച്ചുബിഷപ്പ് പറഞ്ഞു.
