അമേരിക്കന്‍ ലൂര്‍ദിലെ അപ്രത്യക്ഷമാകുന്ന കുരിശിനെ കുറിച്ചറിയാമോ?

1810 ലെ ദുഃഖവെള്ളിയാഴ്ച ഒരു കൂട്ടം ആശ്രമ സഹോദരന്മാർ ന്യൂ മെക്സിക്കോയിലെ ഒരു ചെറു കുന്നിൻ ചരുവിൽ ഒത്തുകൂടി. അതിലൊരാൾ കുറച്ച് അകലെയായി ഒരു ദുരൂഹമായ വെളിച്ചം കണ്ടു. അതെന്താണെന്ന് നോക്കുവാൻ അവർ ആ പ്രകാശം കണ്ട സ്ഥലത്തേക്ക് നടന്നു.

അവിടെ മണ്ണിൽ കുഴിച്ചിട്ട ഒരു മരക്കുരിശ് അവർ കണ്ടെത്തി. ഈ പ്രകാശം പൊഴിക്കുന്ന കുരിശ് അവിടെ അടുത്തുള്ള സാന്താക്രൂസ് ദേവാലയത്തിലേതാണെന്ന് അവർ തിരിച്ചറിഞ്ഞു. അവർ ഈ കുരിശ് ദേവാലയത്തിൽ തന്നെ തിരിച്ചെത്തിച്ചു. എന്നാൽ നേരം വെളുത്തപ്പോൾ കുരിശ് വീണ്ടും അപ്രത്യക്ഷമായി. അന്വേഷണത്തിൽ കുരിശ് കണ്ടെത്തിയ അതേ മലഞ്ചെരുവിൽ വീണ്ടും കണ്ടെത്തി.

തിരിച്ചെത്തിച്ച കുരിശ് രണ്ടു തവണ കൂടി പഴയ മലഞ്ചെരുവിൽ പ്രത്യക്ഷപ്പെട്ടതോടെ ഇതിനുപിന്നിലെ ദൈവിക പദ്ധതി അവർ മനസ്സിലാക്കി. ഈ കുരിശിനെ ഉൾക്കൊള്ളിച്ച് ഒരു ചെറിയ ദേവാലയം പണിതു. ഇതാണ് ‘അമേരിക്കൻ ലൂർദ്’ എന്നറിയപ്പെടുന്ന ‘എൽ സാൻചൂറിയോ ഡി ഷിമായോ’.

എല്ലാവർഷവും ദുഃഖവെള്ളിയാഴ്ച ആയിരക്കണക്കിന് തീർത്ഥാടകർ ഈ ദേവാലയത്തിൽ കുരിശിന്റെ വഴി പ്രാർത്ഥന നടത്തി എത്തുന്നു. പലരും വലിയ മരക്കുരിശ് ചുമന്ന് കിലോമീറ്ററുകളോളം കാൽനടയായാണ് ഈ മലഞ്ചെരുവിലെ ദേവാലയത്തിൽ എത്തുന്നത്. കുരിശ് അൾത്താരയിൽ സ്ഥാപിച്ചപ്പോൾ കുരിശ് നിന്നിരുന്ന ഇടം ഒരു ചെറിയ കുഴിയായി രൂപാന്തരപ്പെട്ടു. ഈ കുഴിയിൽ നിന്ന് ചെളിനിറഞ്ഞ മണ്ണ് രോഗ സൗഖ്യത്തിനായി ജനങ്ങൾ കൊണ്ടുപോകുന്നുണ്ട്.

മരിയന്‍ ടൈംസിലെ ഇന്നത്തെ പ്രധാനപ്പെട്ട അപ്ഡേറ്റുകള്‍ താഴെ ലഭിക്കുന്നതാണ്.