മലയാളി വൈദികന് ഉന്നത പേപ്പല്‍ ബഹുമതി
വത്തിക്കാൻസിറ്റി: ക്ലരീഷൻ സന്യാസസഭാംഗവും മലയാളിയുമായ ഫാ. ജോസ് കൂനംപറമ്പിൽ സി.എം.എഫിന് ആഗോളസഭയ്ക്കും പാപ്പയ്ക്കും വേണ്ടി സ്തുത്യർഹ സേവനം ചെയ്യുന്ന സന്യസ്തർക്കു നൽകുന്ന ‘പ്രൊ എക്‌ളേസിയ എത്ത് പൊന്തിഫിച്ചേ’ ബഹുമതി സമ്മാനിച്ച് ഫ്രാൻസിസ് പാപ്പ. ക്ലരീഷൻ സമൂഹത്തിന്റെ കേരളത്തിലെ സെന്റ് തോമസ് പ്രൊവിൻസ് അംഗമായ ഫാ. ജോസ് കൂനംപറമ്പിൽ 2000 മുതൽ നവസുവിശേഷവത്ക്കരണ തിരുസംഘത്തിൽ സഭാ നിയമവിദഗ്ധനായി സേവനം ചെയ്യുകയാണ്.
ഇദ്ദേഹത്തിന്റെ സന്യാസ വ്രതവാഗ്ദാന സുവർണ ജൂബിലിദിനമായ മേയ് 31ന് വത്തിക്കാനിൽവെച്ച് നവസുവിശേഷവത്ക്കരണ തിരുസംഘം അധ്യക്ഷൻ കർദിനാൾ ലൂയിസ് ടാഗ്ലേ പേപ്പൽ ബഹുമതി മുദ്ര ഫാ. കൂനംപറമ്പിലിനെ അണിയിച്ചു. റോമിലെ ലാറ്ററൻ യൂണിവേഴ്‌സിറ്റിയിൽനിന്ന് സഭാനിയമത്തിലും സിവിൽ നിയമത്തിലും ഡോക്ടറേറ്റ് നേടിയ ഇദ്ദേഹം 1985 മുതൽ ബംഗളൂരുവിലെ സെന്റ് പീറ്റേഴ്‌സ് സെമിനാരി ഉൾപ്പെടെ നിരവധി വൈദിക പരിശീലന കേന്ദ്രങ്ങളിൽ അധ്യാപകനായിരുന്നു.
കോതമംഗലം രൂപത പള്ളിക്കാമുറി ഇടവക കൂനംപറമ്പിൽ പരേതരായ ജോസഫിന്റെയും അന്നമ്മയുടെയും മകനാണ്.
മരിയന്‍ ടൈംസിലെ ഇന്നത്തെ പ്രധാനപ്പെട്ട അപ്ഡേറ്റുകള്‍ താഴെ ലഭിക്കുന്നതാണ്.
