വത്തിക്കാനും ചൈനയും തമ്മിലുള്ള ബന്ധത്തെ കുറിച്ച് കര്‍ദിനാള്‍ പരോളില്‍ പറയുന്നു
പരിശുദ്ധസിംഹാസനവും ചൈനയും ഇപ്പോഴും സംഭാഷണത്തിൻറെ പാതയിലാണെന്ന് വത്തിക്കാൻ സംസ്ഥാനകാര്യദർശി കർദ്ദിനാൾ പീയെത്രൊ പരോളിൻ.
വേനൽക്കാല വിശ്രമത്തിനായി ഇറ്റലിയുടെ വടക്കു ഭാഗത്തുള്ള ത്രെന്തീനൊ പ്രദേശത്ത് എത്തിയിരിക്കുന്ന അദ്ദേഹം ആ പ്രദേശത്തെ ഓൺലൈൻ മാദ്ധ്യമമായ, “വടക്കുകിഴക്കിൻറെ ശബ്ദം” എന്നർത്ഥം വരുന്ന “വോച്ചെ ദെൽ നോർദേസ്തിന്” (La Voce del Nordest) അനുവദിച്ച അഭിമുഖത്തിലാണ് ഇതെക്കുറിച്ചു പരാമർശിച്ചത്.
2018-ൽ പരിശുദ്ധസിംഹാസനവും ചൈനയും തമ്മിൽ ഒപ്പുവച്ചതും 2020-ൽ രണ്ടു വർഷത്തേക്കുകൂടി പുതുക്കിയതുമായ ചരിത്രപരമായ ഉടമ്പടിയെക്കുറിച്ചു സൂചിപ്പിച്ചുകൊണ്ട് കർദ്ദിനാൾ പരോളിൻ, കോവിദ് 19 മഹാമാരി കാലഘട്ടം ഈ ഉടമ്പടിയുമായി ബന്ധപ്പെട്ട കാര്യങ്ങളിലുള്ള സുഗമമായ മുന്നേറ്റം ആയാസകരമാക്കിയെന്നും അനുസ്മരിച്ചു.
ചൈനയിലെ കത്തോലിക്കാസഭയുടെ ജീവിതത്തെയും മറ്റു കാര്യങ്ങളെയും കുറിച്ചുള്ള ചർച്ചകളും, അതുപോലെതന്നെ, കൂടിക്കാഴ്ചകളും എത്രയും വേഗം പുനരാരംഭിക്കാൻ കഴിയുമെന്ന പ്രത്യാശയും അദ്ദേഹം പ്രകടിപ്പിച്ചു.
ഏഷ്യയിലെ ഈ മഹാരാജ്യത്തെ കത്തോലിക്കർ ഏകുന്ന വിശ്വാസ സാക്ഷ്യത്തെക്കുറിച്ച് അഭിമാനംകൊണ്ട കർദ്ദിനാൾ പരോളിൻ അവർ എന്നും നല്ല പൗരന്മാരും നല്ല കത്തോലിക്കാവിശ്വാസികളുമായി തുടരട്ടെയെന്ന് ആശംസിച്ചു.
മരിയന്‍ ടൈംസിലെ ഇന്നത്തെ പ്രധാനപ്പെട്ട അപ്ഡേറ്റുകള്‍ താഴെ ലഭിക്കുന്നതാണ്.
