ഇന്ത്യയിലെ ഏറ്റവും ഉയരമുള്ള ക്രിസ്തു രൂപം ബംഗളൂരുവില്‍ വരുന്നു
ബംഗളൂരു: ഇന്ത്യയിലെ ഏറ്റവും ഉയരം കൂടിയ ക്രിസ്തു രൂപം നിര്‍മിക്കാനുള്ള തയ്യാറെടുപ്പിലാണ് ബംഗളൂരുവിലെ കത്തോലിക്കര്‍. ബാംഗ്ലൂര്‍ അതിരൂപതയുടെ കീഴിലുള്ള 10 ഏക്കര്‍ ഭൂമിയില്‍ 100 അടി ഉയരമുള്ള ക്രിസ്തുശില്പം നിര്‍ക്കാനാണ് പദ്ധതി.
ഈ രൂപം പൂര്‍ത്തിയാകുമ്പോള്‍ 108 അടി ഉയരം വരുമെന്ന് അധികാരികള്‍ പറയുന്നു. പോളണ്ടില്‍ ഇപ്പോഴുള്ള ക്രിസ്തുരാജന്റെ ശില്പത്തോളം ഉയരമുണ്ടാകും ഇതിനെന്നാണ് വാദം. പോളണ്ടിലെ ക്രിസ്തുരൂപം പൂര്‍ത്തിയായത് 2010 ലാണ്.
എന്നാല്‍ ചില ഹിന്ദു സംഘടനകള്‍ എതിര്‍പ്പുകളുമായി മുന്നോട്ടു വന്നിട്ടുണ്ട്. തങ്ങളുടെ ദേവന്‍ വസിക്കുന്ന കുന്നിലാണ് ക്രിസ്തുവിന്റെ രൂപം സ്ഥാപിക്കാന്‍ ഒരുങ്ങുന്നതെന്നാണ് അവരുടെ വാദം. ഈ കുന്ന് അറിയപ്പെടുന്നത് കപാല്‍ബേട്ട എന്നാണ്. തങ്ങളുടെ ദേവനായ കപാലി ബേട്ട ഇവിടെയാണ് വസിക്കുന്നതെന്നും അതിനാല്‍ ഇവിടെ ശില്പം നിര്‍മിക്കാന്‍ ക്രിസ്ത്യാനികള്‍ക്ക് അവകാശമില്ലെന്നുമാണ് ഹിന്ദുക്കള്‍ പറയുന്നത്.
എന്നാല്‍ ഇപ്പോള്‍ നടക്കുന്ന വിവാദം അനാവശ്യമാണെന്നും രാമനഗര ജില്ലയിലുള്ള ഭൂമി വളരെ വര്‍ഷങ്ങളായി സഭയുടെ അധികാരത്തിലുള്ളതാണെന്നും അതിരൂപത മീഡിയ കമ്മീഷന്‍ ചെയര്‍മാന്‍ ഫാ. സിറില്‍ വിക്ടര്‍ ജോസഫ് പറഞ്ഞു.
