മുസ്ലിം സഹോദരങ്ങളോട് സൗഹാര്ദത്തിലേര്പ്പെടൂ; ഈശോ സഭ വൈദികന്
![](https://www.mariantimesworld.org/wp-content/uploads/2020/03/Christian_Muslim.jpg)
കൊല്ക്കത്ത: അതിനിര്ണായകമായ ഈ കാലസന്ധിയില് മുസ്ലിം സഹോദരങ്ങളുമായി നല്ല ബന്ധത്തിലേര്പ്പെടാന് ക്രിസ്ത്യാനികള് തയ്യാറാകണം എന്ന് ഈശോ സഭ വൈദികന്. ഡെല്ഹി ആസ്ഥാനമായുള്ള ഇസ്ലാമിക് സ്റ്റഡീസ് അസ്സോസിയേഷന് സെക്രട്ടറി ഫാ. വിക്ടര് എഡ്വിന് ആണ് ഈ അഭിപ്രായം പറഞ്ഞത്.
‘മുസ്ലീങ്ങളോട് ഗാഢമായ ആദരവ് പുലര്ത്തണം എന്നാണ് കത്തോലിക്കാ സഭ ആവശ്യപ്പെടുന്നത്. ഇസ്ലാം മതത്തിലെ സമ്പന്നമായ പാരമ്പര്യം ഈ ലോകത്തില് ദൈവത്തിന്റെ സാന്നിധ്യത്തിന്റെയും പ്രവര്ത്തിയുടെയും അടയാളമാണ്. മുസ്ലീങ്ങളോട് സൗഹാര്ദപരമായ ബന്ധം പുലര്ത്താന് ക്രിസ്ത്യാനികള് തയ്യാറാകേണ്ടത് വളരെ അത്യാവശ്യമാണ്’ കൊല്ക്കത്തയില് വച്ചു നന്ന ക്രിസ്ത്യന്-മുസ്ലിം ബന്ധത്തെ ആസ്പദമാക്കിയുള്ള സെഷനില് ഫാ. എഡ്വിന് അഭിപ്രായപ്പെട്ടു.
ഇസ്ലാം മതക്കാരുമായി ആഴമുള്ള സംവാദങ്ങളില് ഏര്പ്പെടാന് അവരുടെ വിശുദ്ധ ഗ്രന്ഥങ്ങള് ശ്രദ്ധയോടെ പഠനവിധേയമാക്കണം എന്നും അദ്ദേഹം കൂട്ടിച്ചേര്ത്തു. ഡെല്ഹി ആസ്ഥാനമായുള്ള വിദ്യാജ്യോതി കോളേജ് ഓഫ് തിയോളജിയില് പഠിപ്പിക്കുകയാണ് ഫാ. എഡ്വന്.