സംരംഭങ്ങളെ ആരാധിക്കുന്നവര്‍ വിശ്വാസത്തെ അവഗണിക്കുന്നു എന്ന് ഫ്രാന്‍സിസ് പാപ്പാ
വത്തിക്കാന്‍ സിറ്റി: സഭയുടെ പരിപാടികള്‍ക്ക് കൂടുതല്‍ പ്രാധാന്യം കൊടുക്കുകയും വിശ്വാസത്തിന്റെ അന്തസത്ത ജീവിക്കുന്നതില്‍ വീഴ്ച വരുത്തുകയും ചെയ്യുന്ന വൈദികര്‍ക്ക് ഫ്രാന്‍സിസ് പാപ്പായുടെ വിമര്‍ശനം. സംരംഭങ്ങള്‍ നടത്തുന്നതില്‍ ഒരു വൈദികന്‍ എത്രമാത്രം കാര്യക്ഷമതയുള്ളയാളാണ് എന്നതായിരിക്കരുത് അയാളുടെ ശുശ്രൂഷയുടെ അളവുകോല്‍ എന്നും പാപ്പാ ഓര്‍മിപ്പിച്ചു.
‘സംരംഭങ്ങളെ ആരാധിക്കുന്നത് കാതലായ കാര്യത്തെ മാറ്റിവയ്ക്കലാണ്. ഒരു വിശ്വാസം, ഒരു ജ്ഞാനസ്‌നാനം, എല്ലാവരുടെയും പിതാവായ ഒരേയൊരു ദൈവം. അതാണ് കാതലായ വിശ്വാസം. സംരംഭങ്ങളോട് അമിതമായി ഒട്ടിച്ചേരുന്നവര്‍ കൂട്ടായ്മയുടെ അളവുകോലിനെ അപകടത്തിലാക്കുന്നു’ പാപ്പാ കുറ്റപ്പെടുത്തി.
ജോണ്‍ ലാറ്ററന്‍ ദേവാലയത്തില്‍ നേരിട്ട് പ്രസംഗിക്കുവാനാണ് ആദ്യം തീരുമാനിച്ചിരുന്നതെങ്കിലും സുഖമില്ലാതിരുന്നതിനാല്‍ പാപ്പാ വത്തിക്കാനില്‍ തന്നെ തങ്ങുകയായിരുന്നു. പാപ്പായ്ക്കു വേണ്ടി റോം രൂപത വികാരി ജനറാല്‍ കര്‍ദിനാള്‍ ആഞ്ചെലോ ഡി ഡൊണാറ്റിസ് പ്രസംഗം വായിക്കുകയായിരുന്നു.
