ബൈബിള്‍ പഠനത്തിനായുള്ള ദൈവവചന ഞായര്‍ ജനുവരി 26 ന്
വത്തിക്കാന്‍ സിറ്റി: ബൈബിള്‍ പഠിക്കുന്നതിനും ആഘോഷിക്കുന്നതിനും പ്രചരിപ്പിക്കുന്നതിനുമായി ഒരു പ്രത്യേകദിനം ഫ്രാന്‍സിസ് പാപ്പാ പ്രഖ്യാപിച്ചു. ദൈവ വചന ഞായര്‍ എന്നായിരിക്കും ഈ ദിനം അറിയപ്പെടുക.
വര്‍ഷത്തില്‍ ക്രിസ്മസ് കാലം കഴിഞ്ഞുള്ള സാധാരണ കാലത്തിന്റെ മൂന്നാം ഞായര്‍ ദിവസമായിരിക്കും ഇനി മുതല്‍ ദൈവ വചന ഞായറായി ആചരിക്കുക. ഈ വര്‍ഷം ദൈവ വചന ഞായര്‍ ജനുവരി 26 നാണ്.
ഉത്ഥിതനായ ക്രിസ്തു തന്റെ വചനത്തിന്റെ നിധി നമുക്കായി തുറന്നു തരുന്ന അനുഭവം നവമായി അനുഭവിക്കാന്‍ ദൈവ വചന ഞായര്‍ സഹായകരമാകും എന്ന് പാപ്പാ പറഞ്ഞു. വചനത്തിന്റെ അളക്കാനാവാത്ത സമൃദ്ധികള്‍ ലോകത്തോടു പങ്കുവയ്ക്കാന്‍ ഈ ദിവസം നമ്മെ ശക്തരാക്കും എന്ന് പാപ്പാ കൂട്ടിച്ചേര്‍ത്തി.
